Այս տարվա կենտրոնացված քննությունների համար նախատեսված հայոց լեզվի շտեմարանները իսկական գլխացավանք դարձան:
Այս տարի ԳԹԿ-ն ընդունելության քննություններն անցկացնելու համար կազմեց շտեմարաններ, որոնց առաջադրանքներից էլ բախկացած են լինելու այս տարվա ընդունելության քննությունները: Թվում էր` այս որոշումը լիովին պետք է բավարարեր դիմորդներին: Սա հեշտացնում է նրանց գործը. կա պատրաստի շտեմարան, մնում է միայն պարապել: Բայց արի ու տես, որ դիմորդներն այդքան էլ գոհ չմնացին շտեմարանում ընդգրկված հարցերից: Աշակերտների հավաստմամբ` թեստերի անհասկանալի հարցերին անգամ կրկնուսույցները չեն կարողանում պատասխանել: Շտեմարանում առկա անհասկանալի հարցերի շուրջ բողոքներն ու քննարկումներն իսկական գլխացավանքի վերածվեցին:
Դիմորդների քայլեր ձեռնարկեցին անորակ շտեմարանների դեմ:
Դիմորդների բողոքներին ոչ ոք ականջ չէր դնում, մինչև 189 դպրոցի աշակերտ Մուշեղ Հովսեփյանը նամակ ուղարկեց «Կրթության ազգային ինստիտուտի» փոխտնօրեն Աստղիկ Բախշյանին` խնդրելով միջնորդել շտեմարանների դեմ իրենց բողոքներին: Մինչ այդ Մուշեղը ֆեյսբուքի և թվիթերի իր էջերում անընդհատ գրում էր շտեմարաներում եղած անճշտություների մասին և խնդրում հաշվի առնել իրենց կարծիքը: Բայց, ինչպես տեսնում ենք, այս անգամ սոցցանցերի գրառումներից առավել ուժեղ էր նամակը, որը Աստղիկ Բախշյանը հրապարակեց ֆեյսբուքյան իր էջում և խոստացավ լուծում տալ հարցին: Այս հրապարակումը մեծ աղմուկ բարձրացրեց. նամակը մի քանի րոպեում տարածվեց գրեթե բոլոր կայքերում:
ԿԳ նախարարի, հայագետի և շտեմարանը կազմողների պատասխանը դիմորդներին:
Լատվամիջոցները սկսեցին հետաքրքրվել Մուշեղով: ԶԼՄ-ների ուշադրության կենտրոնում հայտնվելը պարտավորեցնող էր ոչ միայն լրատվամիջոցների, այլ ԳԹԿ-ի համար: Արեմն Աշոտյանը ֆեյսբուքյան իր էջում անդրադարձավ Մուշեղի նամակին` խոստանալով ԳԹԿ-ի հետ մասնագիտական քննարկման ժամանակ բարձրացնել մի շարք քննական հարցադրումներ անվավեր ճանաչելու հարցը և կանխել վատորակ թեստերի օգտագործումը քննությունների ընթացքում: Ինչ վերաբերում է ուսուցիչներին, ապա այս հարցում նրանք լիովին դիմորդների կողմից են:
Հարցի շուրջ մեկնաբանություններից զերծ չմնաց լեզվաբան, հայագետ Դավիթ Գյուրջինյանը, ով ֆեյսբուքի իր էջում կատարեց հետևյալ գրառումը. «Հայոց լեզվի և գրականության շտեմարանի «բոցերից»։ Պարզվում է՝ հայերենում թունել բայ կա: Պարզվում է նաև, որ թունել-ը խոսակցական բառ է և նշանակում է «թունավորել», այսինքն՝ թույնել` ըստ Է. Աղայանի բառարանի, որը թեստակազմիչների Սուրբ գիրքն է»:
Հայագետի հետ կարծես այդքան էլ չհամաձայնեց Փառանձեմ Մեյթիխանյանը, ով մասնակցել էր շտեմարանի կազմման աշխատանքներին: Այս հարցի շուրջ «Առաջին լրատվականի» հետ ունեցած հարցազրույցի ժամանակ Փ. Մեյթիխյանը նշել էր. « Եթե շտեմարան կա, պատասխանը կա: Թող «Ֆեյսբուքում» քիչ գրառում կատարեն, նստեն պատասխանները սովորեն»:
Դիմորդների ակնկալիքները «Դիմորդներ ընդդեմ շտեմարանների» պայքարից
Մինչ ԳԹԿ-ի շտեմարանի շուրջ քննարկումներ ծավալելը, դիմորդները բողոքի ակցիաներ էին կազմակերպել նաև ԳԹԿ շենքի դիմաց և հայտարարել, որ կբողոքեն այնքան, մինչև իրենց կլսեն: Այժմ կրքերը փոքր-ինչ հանդարտվել են: ԳԹԿ-ն խոստացել է վերանայել շտեմարանի որոշ կետեր: Դիմորդները նշում են, որ գոհ են ներկա արդյունքներից, բայց առավել գոհ կլինեն, երբ տեսնեն փոփոխված շտեմարանները:
«Պայքար անորակ Շտեմարանների դեմ» խմբի առեղծվածային անհետացումը ֆեյսբուքից
Շտեմարանների շուրջ քննարկումները դիմորդները շարունակում էին «Պայքար անորակ շտեմարանների դեմ» ֆեսբուքյան խմբում, մինչև վերջինիս առեղծվածային անհետացումը: Դիմորդների մեծ մասն այս երևույթը բացատրում է նշելով` «Երևում է Մեյթիխանյանը գրանցվել է ֆեյսբուքում»: Այլ կերպ ասած` գործին խառնվել է ԳԹԿ-ն:
Հ.Գ.
Թող ներեն ինձ շտեմարան կազմողները, բայց ես չեմ կարողանում պատկերացնել մի դիմորդի և ոչ միայն դիմորդի, ով կկարողանար կնդրուկ, ուրթ,գուպար, գուլ, գուռ, բարեմույն, ազազուն և նման բառերը բացատրել մեզ համար հասկանալի հայերենով: Եթե անգամ մեր երևակայությունը հերիքի բացատրություններ գտնել այս բառերի համար, չեմ կարծում, թե կկարողանանք նույնն անել օրինակ` սիգալ բառի հետ, որը ոչ թե դերասանի անուն է, այլ հայերեն ածական (ըստ Անդրանիկ Կռանեանի «Բառգիրք հայերեն լեզուի»` յոխորտալ, պարծենալ, նազել ) կամ գռուզը, որը ոչ թե ռուսերենից թարգմանաբար նշանակում է բեռ, այլ պարզապես հայերեն գանգուր բառի հոմանիշը: Դիմորդները պետք է նաև հիշեն, որ մաշտոցն այս դեպքում ոչ թե մեր տառաստեղծ Մեսրոպ Մաշտոցն է, այլ անասունների մազը սանրելու գործիք:
Դիմորդներն ընդդեմ շտեմարանների
Comments
Post a Comment