Աղանդավորներին մեկ անգամ լսելուց հետո, հասկանում ես, որ նրանք բավականին հետաքրքիր զրուցակիցներ կարող են լինել

«Մենք կարող ենք Ձեզ հետ զրուցել: Եթե դեմ չեք, մենք կցանկանայինք խոսել Ձեր ապագայի մասին: Դուք դեռ չգիտեք` Ձեզ ինչ է սպասվում»:

Եթե դուք հանգիստ նստած եք որևէ մի տեղ, և պատահաբար ձեզ է մոտենում մի անծանոթ`այսպիսի զրույց սկսելով, ապա ավելի լավ կլինի չլսել նրան, եթե, իհարկե, հետաքրքրված չեք աղանդավորական խմբերով և չեք ուզում համալրել նրանց շարքերը:

Անձամբ ես «բախտ» ունեցել եմ նման անցորդների հետ շփվելու: Երբ ցանկություն չհայտնեցի նրանց հետ խոսելու, նրանցից մեկը, մոտ 55 տարեկան մի կին, մատ թափ տվեց վրաս ասելով`

_Դուք դեռ չգիտեք` ձեզ ինչ է սպասվում: Բոլորիս վերջն էլ դա է լինելու: Բայց մենք կարող ենք օգնել ձեզ փոխել ձեր ճակատագիրը:

Այս կնոջ ասածները ոչ թե վախեցրին, այլ հունից հանեցին ինձ: Եթե ես բավականաչափ համառ չգտնվեի, հավանաբար նա իմ կամքին հակառակ կպատմեր ինձ իմ ողջ ապագան` իր մութ կողմերով հանդերձ:

Տեսնելով, որ ինձանից բան դուրս չի գալիս, կանայք մոտեցան իմ հարևան նստարանին նստած երեք դեռահասներին: Բայց նրանց հետ էլ զրույցն այդքան հաջող չստացվեց: Ես լսեցի, որ աղջիկներից մեկը նրանց հեռանալուց հետո ասաց, որ հետաքրքրության համար կարելի էր լսել, թե ինչ էին ասում: Ի՞նչը կարող էր նման մարդկանց հետ զրույցում հետաքրքություն առաջացնել աղջկա մեջ:

_Ինձ ուղղակի հետաքրքիր էր, թե ինչ էին ասելու: Համ էլ զվարճալի էր, մեկա լուրջ չէինք ընդունելու ասածները,-ասում է 16-ամյա աղջիկը` պատասխանելով հարցիս:

Ընկերուհիների մերժելուց հետո կանայք հեռացան նոր ունկնդիրներ փնտրելու: Եթե դրսում զրուցակից չգտնվի, ինչը քիչ հավանական է, հոգ չէ դրա համար կան նաև տներ, որտեղ զրուցելն ավելի հարմար է, հատկապես եթե երիտասարդ զրուցակից ես գտել:

_ Մի անգամ տանը ես ու երկու մեծ քույրերս էինք: Դուռը թակեցին,  բավականին հաճելի արտաքինով կին էր: Ասաց, որ ուզում է Հիսուսից խոսել: Ճիշտն ասած, մտածեցինք քրիստոնյա է և ներս հրավիրեցինք: Քանի որ երկար խոսելու ժամանակ չունեինք խնդրեցինք, որ հետո գա: Նա մի գիրք թողեց, որ կարդանք: Երբ կարդացինք, հասկացանք, որ Եհովայի մասին էր: Հաջորդ օրը, երբ այդ կինը եկավ, ասացինք, որ չենք ուզում խոսել և հետաքրքրված չենք իրենց աղանդով: Այդ կինը  անընդհատ պնդում էր, որ լսենք իրեն, ինքը կբացատրի գրվածքները, որոնք հավանաբար չենք հասկացել: Բայց մենք մերժեցինք և խնդրեցին, որ էլ մեր տուն չգա և չանհանգստացնի մեզ,-պատմում է 20-ամկա Արմինեն:

Աղանդավորներին չես կարող դատապարտել նաև այն ժամանակ, երբ նրանք դրդում, պնդում և համոզում են լսել իրենց: Նրանցից խուսափելու համար միակ բանը, որ կարող ես անել` նրանցից հեռու մնալն է:

Մարդու իրավունքների համընդհանուր հռչակագրի 18-րդ հոդվածը սահմանում է. «Յուրաքանչյուր ոք ունի մտքի, խղճի ու դավանանքի ազատության իրավունք. այս իրավունքը ներառում է իր դավանանքը կամ համոզմունքները փոխելու ազատություն և իր դավանանքին կամ համոզմունքներին հետևելու ազատություն, մենակ կամ ուրիշների հետ համատեղ, հրապարակայնորեն կամ գաղտնի` քարոզի, ժամերգության, կրոնական ու ծիսական արարողությունների ձևով»:

Հռչակագիրը «իդելական» է երկու կողմերի համար էլ. այն մի կողմից պաշտպանում է մեզ աղանդավորներից, մյուս կողմից էլ նրանց պաշտպանում մեզնից: Եթե անգիտակցաբար հայտնվել ես նրանց շարքերում, ապա բողոքելն ու անգամ նրանց դատի տալը քեզ իրենց շարքերը ներքաշելու համար անօգուտ է: Որոշումը կայացրել ես դու, որովհետև ազատ ես դավանանք և համոզմունքներ փնտրելու:

Քաղաքավարությունից և հետաքրքրությունից դրդված ընդունում ու լսում ենք աղանդավորներին մեր հարկի տակ: Մտածում ենք, որ մեկ է լուրջ չենք ընդունելու ու չենք լսելու այս մարդկանց խորհուրդները: Մի գեղեցիկ օր էլ նրանք խոսելու փոխարեն մի գիրք են մեզ թողնում, որը ձանձրույթից կամ էլի հետարքրությունից դրդված կարդում ենք: Եթե անգամ չհասկանանք գիրքը, հոգ չէ, նրանք նորից կհայտնվեն մեր կողքին գրվածնքները յուրովի բացատրելու և ճիշտ մենաբանելու համար: Մի օր էլ կհասկանանք, որ դա աշխարհի ամենահրաշալի գիրքն է, ու էլ երբեք չենք բաժանվի դրանից: